Historie

De allereerste poging óm ein joekskepel op te richte veur de muzikale begeleiding van de Boerebroelof Zjwaame waerde gedaon door Cor Leijendekkers in 1996. Mit zeve persone waerde begós ónger leiding van Pierre Geerlings in de basissjool oppe Hei. Dees poging doerde echter mer ein paar maondj ómdet d’r miense biej deze groep wore, die zo zunig op häör instrument wore, det ze ’t instrument de heel waek in ’t kufferke lete zitte.

In april 1998 waerde door Cor Leijendekkers biej alle leje van de Boerebroelof Zjwaame eine breef bezorg mit de vraog of ze zin haje óm ein joekskepel op te sjtarte en in mei sjtónge 10 jónges en maedjes al in de winkel van Jo Joosten in Melik óm ein instrument te koupe. De eerste rippetiesie sjtarde in september van detzelfde jaor en vónj plaats in ‘t aad sjtasiegebouw van de NS. Es muzikale leider woor opnuuj Pierre Geerlings gesjarterd. In ’t begin ging ’t ein bietje moejjelik want, op eine inkeling nao, haaj nag noojt emes ein instrument besjpeeld, laot sjtaon note gelaeze.

Nao de grote optoch in 1999 waerde door ein lid van joekskepel Kepotmaekerie aan Cor Leijendekkers gevraog, wanneer det veur èns begóste mit optraeje. Cor zien antjwaord woor toen: “Det kump waal!” Hae dach toen “Det is eine goejje naam veur ós kepel” en sjtèlde det den ouch drek veur aan de anger leje van de joekskepel. Ónger de repetiesie heurde men namelik ouch dök “Mer röstig aan, ’t kump waal” en zo woor de naam ’t Kump Waal Zjwame al gauw ein feit.

Nao ein tiedje in ’t aad NS-gebouw geoefend te höbbe, waerde verhoes nao de kelder biej ein van de leje thoes. Mer de groep gruijde en de kelder waerde al gauw te klein. De Blokhut van Jong Nederland waerde, en is nag sjteeds, ós rippetiesieruumte. Anno 2011 is de groep oetgegruijd toet 23 persone. In taengesjtèlling toet de beginjaore, hoof men gein lid meer te zin van de Stichting Boerebroelof Zjwaame óm biej de joekskepel te kènne kómme. Boete det veur in ’t vastelaovindjsezoen mit de Boerebroelof mit trèkke, traeje veur ouch nag links en rechs geweun es joekskepel ’t Kump Waal op.